هل فعلاً عدسات سناب شات تجيب ارباح؟ توضيح مهم للمستخدمين
كثير من الناس سمعوا عن ارباح عدسات سناب شات، وتداول البعض ان في ناس تحقق مبالغ كبيرة من خلالها. لكن في الواقع، الصورة مختلفة شوي ولازم نوضح الحقيقة
كيف يتم الربح من عدسات سناب شات؟
الربح من عدسات سناب شات ما يجي من شركة سناب نفسها. سناب شات ما تعطي فلوس لصناع العدسات حتى لو انتشرت العدسة وصارت مشهورة. الارباح الفعلية تجي من المستخدمين عن طريق "الكرستالات" داخل التطبيق
مثال بسيط:
- لو سويت عدسة تفاعلية مثل لعبة فيها مراحل ومهمات، المستخدم يقدر يلعب المجاني منها، لكن لو حب يفتح مرحلة مقفلة، لازم يدفع باستخدام الكرستالات.
- نفس الشي مع عدسات التجميل او المكياج، بعض الخصائص تكون مقفلة وما تنفتح الا بالشراء.
في كل مرة احد يشتري خاصية او يفتح مرحلة من عدستك، تحسب لك نسبة من الكرستالات.
طيب هل فعلاً الناس تشتري؟
الجواب بكل صراحة: نادر جداً.
من النادر ان المستخدمين يشترون خصائص داخل العدسات. معظم الناس تستخدم العدسة لفترة بسيطة وتنتقل لعدسة ثانية، وما يفكرون يشترون شي من داخل العدسة. عشان كذا نقول ان الارباح من العدسات التفاعلية او المقفلة شبه معدومة وما تعتمد عليها كمصدر دخل.
هل العدسات مالها فائدة؟
بالعكس، عدسات سناب شات تعتبر من اقوى وسائل التفاعل والانتشار. العدسة الناجحة :
- تزيد التفاعل في الحساب
- ترفع عدد المشاهدات والمتابعين
- تساعد في بناء اسمك كمصمم عدسات او صاحب محتوى
- ممكن تفتح لك فرصة للتوثيق اذا صار عندك محتوى مميز ونشاط مستمر
يعني العدسة تعتبر اداة تسويق قوية، خاصة لو انتشرت ونزلت في اكسبلور العدسات .
خلاصة الكلام
اذا كان هدفك الاساسي هو الربح المادي فقط، العدسات ممكن ما تحقق لك اللي تبغاه، لأن الشراء من داخل العدسة نادر، والارباح تعتمد على المستخدم نفسه مو على شركة سناب.
لكن اذا هدفك زيادة التفاعل وبناء اسم وانتشار اوسع، فالعدسات تظل خيار ممتاز.